ភ្នំពេញ៖ អគ្គលេខាធិការអង្គការសហប្រជាជាតិលោក Antonio Guterres បានរំជួលចិត្តពេលដែលបានចូលទៅទស្សនាសារមន្ទីរប្រល័យពូជសាសន៍ទួលស្លែង ដោយលោកចាត់ទុកការការរក្សាបាននូវសារមន្ទីរប្រវត្តិសាស្ត្រមួយនេះគឺជាផ្នែកមួយនៃការខិតខំប្រឹងប្រែងក្នុងការធានាថាអំពើទាំងនេះមិនត្រូវកើតឡើងជាថ្មី។

លោក Antonio Guterres បានលើកឡើងក្នុងពេលដែលលោក ដឹកនាំប្រតិភួទៅទស្សនកិច្ចនៅសារមន្ទីរប្រល័យពូជាសាសន៍ទួលស្លែងនារសៀលថ្ងៃទី១៣ ខែវិច្ឆិកា ឆ្នាំ២០២២នេះ ដោយថា៖ «ទីនោះជាកន្លែងក្រើនរំឭកដ៏ចាំបាច់សម្រាប់យើងទាំងអស់គ្នា ហើយឥដ្ឋនិងការ៉ូ ដែលប្រឡាក់ដោយឈាមនៅទីនោះ ជាការព្រមាន និងការចងចាំផងដែរ ហើយត្រូវធានាថា អំពើឃោរឃៅបែបនេះ នឹងមិនកើតឡើងម្តងទៀតនោះឡើយ»។

លោក Antonio Guterres ក៏ថាលោកនឹងយករឿងរ៉ាវដែលលោកបានដឹងឮ និងឃើញនៅទីនេះទៅប្រាប់ចៅស្រីរបស់លោក ដើម្បីឲ្យចៅស្រីរបស់លោក អាចយករឿងរ៉ាវទាំងនេះ ទៅប្រាប់ដល់ចៅៗរបស់ពួកគេផ្សេងទៀត ហើយការចងចាំនៅទីនេះ មិនត្រូវបំភ្លេចជាដាច់ខាត។

ជាមួយគ្នានេះលោកបានថ្លែងថាតុលាការខ្មែរក្រហមបានកាត់ទោសនូវមេដឹកនាំខ្មែរក្រហមជាច្រើននាក់ដែលទទួលខុសត្រូវចំពោះអំពើដែលសាហាវឃោឃៅដែលប្រព្រឹត្តិមកលើប្រជាជនកម្ពុជា និងសង្ឃឺមថាការកាត់ទោសនេះនឹងបានផ្តល់ជាសំឡេងដល់ជនរងគ្រោះ និងអ្នកដែលនៅរស់ពីរបបនេះ។

លោកថា៖ «សំឡេងរបស់ពួកគេមានសារសំខាន់ជាងពេលណាៗទាំងអស់ នៅពេលដែលការនិយាយនាំឲ្យមានការស្អប់គ្នា ការរំលោភបំពាន ការរើសអើង និងការយាយីកំពុងកើតឡើងនៅគ្រប់តំបន់នៃពិភពលោក»៕